الفكــي ترطيبــة

رايته ينزل من سيارته الفارهة.. ذات التظليل العالي الممنوع.... اكرش لامع الوجه مدردم الوجنتين.. يتمختر ويتهادى في مشيته....سالت عنو..دا منو في ناس الحيكومة....؟؟....حيث ان اوصافه قلما توجد في العامة الكشا مشا....ان ذاكرتي ذات السعة المحدودة... اصبحت لا تستوعب كل ناس الحيكومة....وهم كل يوم في زيادة مضطردة..حيث ان فقاسات اتفاقيات السلام اصبحت كل يوم تفرخ لنا عددا منهم ولله الحمد والمنه.....قالو لي هو ليس احدهم... انه فكي.... افتكرت انو شيخ طريقة.....قالو لا دا فكي بتاع كواديك....يعني متخصص يعمل عمل لكل من اراد ان يسجم عدوه وحبيبه....ذكرو انه شاطر ويروّب الموية......وهو الفكي بتاع ناس الكورة وبتاع الفنانين والفنانات.....سمعت ان احدى الفنانات ما عندها شغلة غير قبل كل حفلة تمشي ليهو ويديها ورقة تربطها في طرف توبها وتجي تغني وهي مطمئنة ان كل المستمعين سوف يطربو و هم مكودكين ولا على كيفهم....بفضل كادوك الشيخ ترطيبة...... فكرت كثيرا....واضمرت في نفسي ان اصبح فكي... ولو بعد حين....ولكن لا ان اصبح فكي تقليدي... بالمناسبة هذه الفكرة ليست وليدة لحظة رؤيتي للفكي ترطيبة..ولكنها كلما غلبتني معافرة الدنيا ومصاورة الحياة و مباصرة العيشة افكر فيها جاد......جاد..... حتى انني في ذات مرة فكرت ان استغل تقنية المعلومات لان اصبح فكي بالانترنت....وان انشئ موقعا فيه واسميهو كواديكونلاين دوط كوم....وان اكتب الكواديك في السي دي او الفلاش دسك او الفلوبي ديسك ايهما اسهل وارخص...وان اقوم بتطوير الكواديك وذلك باستغلال خدمة الرسائل في الموبايل....يعني لو واحد داير يعمل كادوك لي زول يجيب لي نمرة موبايلو...وانا اديهو الكادوك..ويكتبو ليهو بشرط ان يكون مع الكادوك فيروس يمنع مسح الكادوك من صندوق الرسائل الفي الموبايل ويلصق الكادوك في الموبايل....يعني لو واحد داير يجكّس واحدة وهي معصلجة عليهو ما عليهو الا يجيب نمرة موبايلها ويرسل لها الكادوك في مسج...وتكون الكلمات شفرة لا يعرفها الا صانع الكادوك الهو انا..... يعني بتاعت الجكيّس دي تكون مثلا" الجاية من السما تحملا الواطا"... وفي هذه الحالة لو كان الذكر شين قرد العاوز يجكسها او الهدف تشوفو زي الغزال......ولو واحد عاوز يكودك مديرو في الشغل ما ليهو الا يديني نمرة الموبايل وانا ارسل ليهورسالة تكودكو وتسجمو وترمدو" ابو القدح ملص قدحو وانبطح"...ابو القدح هو المدير " الهدف".......يعني يبقى زول انبطاحي" دي تنفع مع السياسين مع شوية شمار"....ولو زوجة عاوزة تكودك زوجها.....تكون رسالة"ام عين قوية ركبت التونسية"......وام عين قوية دي طبعا لو أي واحد فكرت تختف زوج الزوجة المعنية.. وركبت التونسية يعني اتلحست.....ولو عاوزاهو يكون طوع بنانها تكون الرسالة الملغومة بالكادوك هي"النعجة عجعجت ناس الحلة".....النعجة هو الزوج" الهدف " وح يقعد نعجة طوالي يشاكل ناس الحلة وفي البيت باااااااع..لانو لو بقى نعجة في البيت وفي الشارع تكون ام الحسين اتنفخت...او تكون " يا المزعمط حبي خلاك تشعبط"......المزعمط هو الزوج ولو كان اصلع ومزعمط انني اضمن مفعول الكادوك مية المية لمدة خمسة سنوات...والشعبطة هنا كناية عن انه لا يستطيع من الزوجة فكاكاً.....والشعبطة تكون متبادلة....وطبعا لكل غرض معين مصطلح كادوكي قصادو......بهذا انبه كل فكي ان لا يستغل هذه الطريقة والا سوف انشبك فيهو واجرجرو من محكمة لمحكمة.....
* الاستاذ الفنان محمود عبد العزيز...عليك الله لما تجي تغني ما تنهرنا في الغنا وتخوفنا و تخلعنا....نحن برانا خايفين و مخلوعين وما عارفين ناس الامم المتحدة دايرين يسو علينا كيفن؟
* لو كنت مكان المتعافي لاشتريت النفايات من المواطنين بدلا عن ان يدفعو... اشتري.الكيلو بمئة جنيه... اشارطكم بعد شهرين عاصمتنا ح تكون انضف عاصمة على وجه الكرة الارضية....وح يقل عدد الشحادين الفي الشوارع.....
* لو كنت وزير الخارجية.....لتواضعت و قعدت حنكت الامريكان عشان يطلقو سراح سامي الحاج المعتقل في غوانتونامو.
* لو كنت احد ثنائي الجزيرة لاشتكيت تلفزيون السودان عشان البدل بتاعتنا قاعدين يلبسوها قارئى نشرة الاخبار.....هم ليه ماعاوزين يشترو بدل؟
* لو كنت وزير الداخلية لاستقلت وحردت الشغل وقعدت مع وليداتي .. واضان فيها طينة واضان فيها عجينة...
* لوكنت رجل اعمال لاشتريت مركز بوليس ومحكمة في سوبا واخد حقي بايدي وضراعي..هو في حد جايب خبر
اخر الكلام:-
بذكر فيك عهد صباي
علي شاطئ النيل
وحبيبي الكان معاي
اسمر وجميل