احزرن هؤلاء الرجال

في المرة الفاتت حذّرت الرجال من بعض النساء.. لقيت أن من العدل والإنصاف وعدم المكاواة ان أحذّر النسوان من بعض الرجال... والما بتلقى ولا واحدة من الصفات الأنا حأقولها دي في اي راجل تتوكل على الله وتعرسو... والبتكتشف اي صفة في اي واحد وهي معرساهو تحاول ان تقومه، وإن ابا الشكية لله... تقعد معاهو وتتحمل ومأجورة بإذن الله... كل شى ولا خراب البيوت... والرجال ديل هم:

الجكاسي والسياسي والمراسي.. الشناف والعواف والخواف.. الشكّاي والحاكاي والكاواي.. اللعلاع والبرطاع والطماع.. نجي نشوفهم واحد واحد...


الجكاسي

اي كتير الجكيّس قبل الزواج... ودي عادة قلما يتركها اصحابها الا من رحم ربي... زي دا يخليكي ديمة ايدك فوق قلبك وخايفة يجكس من وراكي، وهو قطعا حيسويها.. واحذري ثم احذري ان يسمع غنية (راجل المرا حلو حلاة)..



السياسي

دا ما بيقدر يميز بينك وبين جماهير الشعب.. يكضب عليكي ويوعدك ويكضب.. وكل مرة يغشك بطريقة مبتكرة وجديدة... حكمة ربنا انتي تصدقيهو وفرحانة كمان.. زي الشعب بالظبط والربط... يكضب عليكي لحدي ما يموت.. دا لو ما متي انتي قبالو...



المراسي

معاقر المريسة ومشتقاتها وأخواتها واخوانها.. المراسي دا يجيكي نص الليل شايل معاهو راس خروف وضلافين وينهزك من النوم عشان تقومي تطبخيهن ليهو... وفيهم نوع يشغل المسجل ويخت شريط بتاع فنان شايقي ويحلف عليكي طلاق علا ترقصي وهو ياخد شبال... انتي الليل كلو ترقصي وهو ياخد في الشبالات والنيفة بهناك تحرق والشكلة تقوم.. وفيهم نوع يجيبوهو ليكي اصحابو نص الليل نائم كل يوم ايام الله السبعة.. والغريبة امك تسعلك ما بقيتو تلاتة؟؟... وهي مسكينة ما عارفة انكم قربتو تبقو واحد...



الشنّاف

كتير الشناف... اي حاجة يطلع فيها غلط... ويشيل حال اي حاجة وأي زول يقع تحت يدو.. حتى كديستكم الفي البيت ما بتمرق من شيل حالو.. لازم يطلع فيها شي.. ومرة مرة انتي زاتك يديكي حقك...



العوّاف

دا يعاف اي شي.. اي حاجة تسويها ليهو ما ياكلها، ولو مشى معاكي بيت ناس ابوكي وعندك اخوان صغار وخاصة النوع الديمة عندو نزلة.. وللا عندك حبوبتك كبيرة وللا جدك كبير.. ما يدخل اي حاجة في خشمو.. طول ما هو قاعد عندهم يكون عايف اخوانك وجدك وحبوبتك... ويدخلك في ضفورك ويخليكي تكوسي للإعذار ليهو...



الخواف

اول معرفتك بيهو يعمل فيها عنتر بن شداد... ويقعد يحكي ليك ويكلمك ببطولاتو مع كلاب الحلة والحرامية والرباطين.. وكيف كان بيدقهم... لكن بعدين حتكتشفي انو اخوف زول في الدنيا... ونضمو دا نضم فاضي ساكت.. اول ما يسمع انو في حرامي متلح الحلة حقتكم يقول لك (النعمة؟.. ما مشتهية ناس ابوكي نمشي ناخد معاهم يومين تلاتة؟) هروبا من الحرامي.. وإن شاء الله البيت يسرقوهو كلو...



ا الشكاي

الجنو شكية... خصوصا من المعايش... تلقيهو هامي ويزيدك هم وغم... ويقعد يشكي ليل نهار من الماهية الما مكفياهو، ومن مديرو في الشغل الحاقر بيهو... ومن جيرانو القاعدين يخلوا كيس الوسخ حقهم قدام خشم بابكم... ويمرق برا البيت ويقعد يشتكي منك انتي زاتك...



الحاكاي

من يحاكي خلق الله.. فعلا وقولا... وسلوكا.. ودا حيقعد كل ما يزعل منك.. او اتشاكلو يحاكيكي... يمرق سنونو برا.. ويعوج خشمو ويقول لك (يا سلام عليك يا اخوي)... زي ما بتقوليها انتي.. لحدي ما بيفقدك الثقة في جمالك...



الكاواي

يستمع بالمكاواة... تقولي ليهو ما تبصق السفة في السراميك... يسوي السعوط شغلة يقعد يسف ويبصق اليوم كلو فوق السراميك عشان يكاويكي ويغيظك.. ولو ما كاواكي يقعد اليوم كلو زهجان...



اللعلاع

احب الصوت الجهوري... بالرغم من حلقومو الكبير وكواريكو.. لكن هرشة.. لو صريتي ليهو صرة صغيرونة بيسكت طوالي.. المصيبة انو بسرعة ينسى الصرة ويرجع تاني يلعلع.. وبعدين ونستو كلها بأعلى صوتو يعني ما عندكم سر.. سركم كلو عند الجيران...



البرطاع

من يمشي وهو يبرطع... تسمعي حس نعلاتو... من اول الشارع يحب لبس الشباشب والسفنجات.. كأدوات قوية للبرطعة... يمتاز بكرعين مشققات.. تخان.. خُرُش... نص ميزانيتكم حتروح نعلات..

الطماع

قحف.. قيحة.. اي حاجة عندو بالحساب... من الصابونة.. لحدي طرقات الكسرة يعدهن طرقة طرقة... وحتى القُطْر بتاع الطرقة يعبرو...