من طرف ع ا ص م الثلاثاء مايو 25, 2010 6:42 pmحلمت اللهم أجعلو خير... حلمت إني مسعول كبير في الحيكومة... وعضو في المجلس الوطني... أشوف الناس ملمومة ويلومو في الحيكومة وفي المجلس الوطني وفي المسعولين عشان الفيضانات وأنا قاعد أنضم معاهم:-
(أيها الشعب السوداني... انتو زعلانين عشان المجلس الوطني في إجازة؟. دايرين يعني المجلس الوطني ما يأجز... يقعدو يحلو مشاكل الناس لمتين؟؟. الناس هي ليه ما تتعلم تحل مشاكلها براها... شعب اتكالي... ما فيهو فايدة بمليم... دارين كلو شي تسويهو ليهو الحكومة... وبعدين نواب المجلس الوطني ديل مساكين حسي... مواهيهم ما مكفياهم كمان دايرين تشيلوهم هم..؟؟. انتو قايلين الماهية البتدوها ليهم دي.. ماهية؟. نحن بنشتغلكم قدر قروشكم وأكتر كمان.. وبعدين أتحدى أي مواطن قال أنا اخترت فلان دا ينضم بالنيابة عني.. ناس جابوها بإيدهم وضراعهم... واتبرعو يجو ينضمو مجدعين وليداتهم في نيويورك وفي لندن براهم الله ورقبتهم.. وسط الخواجات ما معروف باكر يبقى عليهم شنو؟. انتو يا شعب الجن قاعدين هنا ووليداتكم قدام عيونكم... وكمان تتفاصحو.. وبعدين نحن من زمان مش قلنا ليكم علمو أولادكم السباحة وركوب الشدر...؟؟. قصرنا فيكم عليكم الله؟. السباحة وركوب الشدر دايرنهن لليوم دا... للفيضانات دي... يعني لما يجي السيل... البيعرف يعوم ونفسو طويل يعوم لمن يركز في حتة... والقدامو شدرة يتشعلق فيها... لحدي ما الواطة تنشف... ومثلنا يالسوداني بيقول كل قرد يطلع شدرتو... افو... القرود تبقى أحسن منكم؟.
أيها الشعب السوداني... الما عندو شغلة غير شيل حال الحكومة... الشعب السوداني الحاسد... انتو قايلين نحن قاعدين ننوم الليل؟؟. كلا وحاشا؟. ننوم وين مع الكهرباء القاطعة دي والمكيفات الما شغالة؟. إن رقدنا برا البعوضة والقراص.. وإن رقدنا جوا الحر.. المعاناة دي لحدي ما نشغل الجنريترات... في معاناة أكتر من كدا؟؟ كلو من أجل رفاهيتكم... لكن انتو ما بتحمدو ربكم... وبعدين كلكم دايرين... تسكنو في فيلل؟ يا حلاة دقدق... نحن ساكنين في الفلل عشان نفكر بعيد من الدوشة والهيصة... عشان نفكر في حل القضية السودانية ودرء الخطر المحدق بالبلاد من الخارج... انتو ما عارفين حاجة ساكت... نحن من المشغولية الواحد ما قادر يحك راسو... وعلينا الطلاق علا جايبين شغالات من الفلبين عشان حك الروسين بس... وندفع من جيوبنا كمان... الواحد الليل كلو سهران يفكر في مشاكل الأمة ويجي النهار ينوم في المجلس الوطني.. وانتو حاسدننا في الغميدة دي؟؟. هو دا نوم؟. نوم الديك فوق الحبل... أيها الشعب السوداني الجاحد ألما يحمد الله وألما بيحمد للحكومة تعبها.. نحن بفضل الله الحكومة الوحيدة في الدنيا دي قلبت الكوليرا اسهالات مائية دا كلو بمجهودات الجهات الصحية وسهرا وتعبها وتجو انتو تنقنقو وتكوركو؟. وبعدين تعالو هنا... الاسهلات المائية مالا؟ ما نضافة للبطن... أيها الشعب السوداني إن بطونكم كعبة والحكومة قررت نضافتها لوجه الله تعالى... اتحداكم تطلعو لي أي حكومة في الدنيا دي قاعدة تنضف لشعبها بطونو... انتو ما بتحمدو الله ساكت... حسي تجي الفيضانات ويقومو ناس بلاد برا يرسلو ليكم كل زول بطانية وجالون زيت ويصوروكم في التلفزيونات والفضائيات تجيبكم... عليكم الله حسي خلقكم وسحنكم دي شبه فضائيات؟ كان ما ساكت... الفضائيات تجيبكم بي شناتكم دي مع ناس هيفاء وهبي ونانسي عجرم... أحمدو ربكم وأسكتو ساكت بس... تمسحو ضلوفكم دي بالزيت كرعيكم الما شافن زيت ديل من الله خلقكم وتتغطو وتتجبدو في البطاطين في أمانة الله... وتنومو وتشخرو ونحن سهرانين حارسين بوابات الوطن... انتو قايلين نحن قاعدين ساكت.. ما شايفين المواتر والعربات الجارية في الشوارع دي والصفافير انتو قايلنها فسحة؟؟. دي كلها حوامة من أجلكم يا ناكرين الجميل.. وتلومونا... وتقطعو في الحكومة؟. أيها الشعب السوداني المسلم... أيحب أن يأكل أحدكم لحم أخيه وهو ميت؟. ناس الحكومة ديل ما اخوانكم.. تقطعو فيهم لشنو؟. وتشيلو حالهم؟؟. انتو قايلين شنو؟. القطيعة في الحكومة حرام... ولوموني لو ما دخلتو النار كلكم... استغفرو ربكم... بس... لكن نحن ناس الحكومة ديل عافين لكم لله والرسول ونبقى أخير منكم...).
هذا الحلم... برعاية موباتيل
آخر الحكاية:-
اختصري في عمري المسافة
وذوبيّ أحزاني رغم الكثافة
يا سُلافة....
وجاية من عُمق الخُرافة
(أيها الشعب السوداني... انتو زعلانين عشان المجلس الوطني في إجازة؟. دايرين يعني المجلس الوطني ما يأجز... يقعدو يحلو مشاكل الناس لمتين؟؟. الناس هي ليه ما تتعلم تحل مشاكلها براها... شعب اتكالي... ما فيهو فايدة بمليم... دارين كلو شي تسويهو ليهو الحكومة... وبعدين نواب المجلس الوطني ديل مساكين حسي... مواهيهم ما مكفياهم كمان دايرين تشيلوهم هم..؟؟. انتو قايلين الماهية البتدوها ليهم دي.. ماهية؟. نحن بنشتغلكم قدر قروشكم وأكتر كمان.. وبعدين أتحدى أي مواطن قال أنا اخترت فلان دا ينضم بالنيابة عني.. ناس جابوها بإيدهم وضراعهم... واتبرعو يجو ينضمو مجدعين وليداتهم في نيويورك وفي لندن براهم الله ورقبتهم.. وسط الخواجات ما معروف باكر يبقى عليهم شنو؟. انتو يا شعب الجن قاعدين هنا ووليداتكم قدام عيونكم... وكمان تتفاصحو.. وبعدين نحن من زمان مش قلنا ليكم علمو أولادكم السباحة وركوب الشدر...؟؟. قصرنا فيكم عليكم الله؟. السباحة وركوب الشدر دايرنهن لليوم دا... للفيضانات دي... يعني لما يجي السيل... البيعرف يعوم ونفسو طويل يعوم لمن يركز في حتة... والقدامو شدرة يتشعلق فيها... لحدي ما الواطة تنشف... ومثلنا يالسوداني بيقول كل قرد يطلع شدرتو... افو... القرود تبقى أحسن منكم؟.
أيها الشعب السوداني... الما عندو شغلة غير شيل حال الحكومة... الشعب السوداني الحاسد... انتو قايلين نحن قاعدين ننوم الليل؟؟. كلا وحاشا؟. ننوم وين مع الكهرباء القاطعة دي والمكيفات الما شغالة؟. إن رقدنا برا البعوضة والقراص.. وإن رقدنا جوا الحر.. المعاناة دي لحدي ما نشغل الجنريترات... في معاناة أكتر من كدا؟؟ كلو من أجل رفاهيتكم... لكن انتو ما بتحمدو ربكم... وبعدين كلكم دايرين... تسكنو في فيلل؟ يا حلاة دقدق... نحن ساكنين في الفلل عشان نفكر بعيد من الدوشة والهيصة... عشان نفكر في حل القضية السودانية ودرء الخطر المحدق بالبلاد من الخارج... انتو ما عارفين حاجة ساكت... نحن من المشغولية الواحد ما قادر يحك راسو... وعلينا الطلاق علا جايبين شغالات من الفلبين عشان حك الروسين بس... وندفع من جيوبنا كمان... الواحد الليل كلو سهران يفكر في مشاكل الأمة ويجي النهار ينوم في المجلس الوطني.. وانتو حاسدننا في الغميدة دي؟؟. هو دا نوم؟. نوم الديك فوق الحبل... أيها الشعب السوداني الجاحد ألما يحمد الله وألما بيحمد للحكومة تعبها.. نحن بفضل الله الحكومة الوحيدة في الدنيا دي قلبت الكوليرا اسهالات مائية دا كلو بمجهودات الجهات الصحية وسهرا وتعبها وتجو انتو تنقنقو وتكوركو؟. وبعدين تعالو هنا... الاسهلات المائية مالا؟ ما نضافة للبطن... أيها الشعب السوداني إن بطونكم كعبة والحكومة قررت نضافتها لوجه الله تعالى... اتحداكم تطلعو لي أي حكومة في الدنيا دي قاعدة تنضف لشعبها بطونو... انتو ما بتحمدو الله ساكت... حسي تجي الفيضانات ويقومو ناس بلاد برا يرسلو ليكم كل زول بطانية وجالون زيت ويصوروكم في التلفزيونات والفضائيات تجيبكم... عليكم الله حسي خلقكم وسحنكم دي شبه فضائيات؟ كان ما ساكت... الفضائيات تجيبكم بي شناتكم دي مع ناس هيفاء وهبي ونانسي عجرم... أحمدو ربكم وأسكتو ساكت بس... تمسحو ضلوفكم دي بالزيت كرعيكم الما شافن زيت ديل من الله خلقكم وتتغطو وتتجبدو في البطاطين في أمانة الله... وتنومو وتشخرو ونحن سهرانين حارسين بوابات الوطن... انتو قايلين نحن قاعدين ساكت.. ما شايفين المواتر والعربات الجارية في الشوارع دي والصفافير انتو قايلنها فسحة؟؟. دي كلها حوامة من أجلكم يا ناكرين الجميل.. وتلومونا... وتقطعو في الحكومة؟. أيها الشعب السوداني المسلم... أيحب أن يأكل أحدكم لحم أخيه وهو ميت؟. ناس الحكومة ديل ما اخوانكم.. تقطعو فيهم لشنو؟. وتشيلو حالهم؟؟. انتو قايلين شنو؟. القطيعة في الحكومة حرام... ولوموني لو ما دخلتو النار كلكم... استغفرو ربكم... بس... لكن نحن ناس الحكومة ديل عافين لكم لله والرسول ونبقى أخير منكم...).
هذا الحلم... برعاية موباتيل
آخر الحكاية:-
اختصري في عمري المسافة
وذوبيّ أحزاني رغم الكثافة
يا سُلافة....
وجاية من عُمق الخُرافة
